Во документот составен од израелското Министерство за разузнавање, како решение за Појасот Газа по соборувањето на Хамас, се препорачува преместување на цивилното население на египетскиот Синајски Полуостров, се вели во копија од документот.

Владините претставници ја минимизираат важноста на споменатиот документ, а од кабинетот на премиерот за израелскиот весник „Хаарец“ изјавија дека тоа се „првични размислувања“ за ова прашање, кои властите во моментов не ги ни разгледуваат, бидејќи фокусот е на војната.

Документот од 13 октомври повикува на преместување на цивилното население во градовите со шатори во северен Синај и на крајот изградба на постојани градови и отворање на хуманитарен коридор. Планот вклучува „стерилна“ тампон зона во Египет широка неколку километри, за да се осигура дека населението не може да се насели на границите на Израел.

Во тој план се наведени проблемите кои може да се појават на меѓународно ниво, но, како што се наведува, тој потег е оправдан со тоа што е претставен како решение за бегалската популација која бара засолниште од војната. Се тврди дека таквото принудно префрлање би послужило и како предупредување за Хезболах - Израел би можел да ги принуди бегалците да заминат во јужен Либан, област претходно окупирана од израелската армија од 1982 до 2000 година.

Документот вклучува и две други опции – контрола на палестинската управа во Појасот Газа или поддршка на локалниот режим, но и двете опции се отфрлаат како проблематични поради различни причини, вклучително и фактот дека тие нема да послужат како пречка за напади врз Израел.

Египет одби да размисли за прифаќање на Палестинците кои бегаат од војната во Израел.