Руските власти тврдат дека нема раздор во нивните редови.

Велат дека извештаите во западните и украинските медиуми дека рускиот претседател Владимир Путин го пуштил „низ вода“ рускиот министер за надворешни работи, Сергеј Лавров, се целосно лажни.

„Нема ништо во овие извештаи што одговара на реалноста“, рече Песков на прес-конференција, пренесува ТАСС. 

Одговарајќи на прашањето дали Лавров е сè уште на функцијата, Песков рече дека „Лавров работи како министер за надворешни работи“.

„Москва Тајмс“,  медиум со седиште во Холандија, вчера објави дека Путин го отстранил Лавров и дека министерот исчезнал од јавноста откако САД ненадејно го откажаа предложениот самит со Русија во Будимпешта, објавува европскиот „Политико“.

Според веб-страницата на руското Министерство за надворешни работи, Лавров последен пат се појавил јавно на 28 октомври, кога учествувал на Меѓународната конференција за евроазиска безбедност во Минск, главниот град на Белорусија.

foto EPA/MAXIM SHIPENKOV