Среде трагедијата што ја погоди Венецуела по двата силни земјотреси, од урнатините пристигнаа сцени кои го обиколија светот и вратија надеж дека животот понекогаш победува и во најтешките моменти.

По разорните потреси, со јачина од околу 7,2 и 7,5 степени според Рихтеровата скала, спасувачките екипи со часови пребаруваа низ урнатините на срушени згради, надевајќи се дека под бетонските плочи и прашината сè уште има преживеани.

Во една од најпотресните спасувачки акции, од урнатините било извлечено бебе старо само 18 дена. Детето било пронајдено живо под остатоците од зграда која целосно се урнала по силниот земјотрес. Снимките од спасувањето предизвикаа силни реакции во јавноста, особено моментот кога бебето било предадено на својот татко, кој не можел да ги сокрие солзите, пишува Женски магазин.

Набргу потоа, спасувачите ја пронашле жива и мајката на бебето. Иако двајцата поминале низ вистински хорор, според првичните информации, тие биле извлечени живи и пренесени на безбедно.

Но, тоа не беше единственото чудо што се случило во хаосот по земјотресите. Во друг потресен случај, бремена жена се породила среде урнатини и паника, откако останала заробена по уривањето на станбена зграда. Поради силниот стрес и драматичните околности, породувањето започнало во момент кога околу неа сè уште се расчистувале остатоците од урнатата градба.

Без соодветна медицинска опрема и во крајно тешки услови, на жената ѝ помогнале присутни граѓани, волонтери и спасувачи. Тие со раце го расчистувале просторот околу неа и направиле сè што можеле за бебето безбедно да дојде на свет.

Овие две приказни, иако се случија во сенката на голема трагедија, станаа симбол на надежта и човечката издржливост. Додека спасувачките тимови продолжуваат да трагаат по преживеани, сцените со спасеното бебе и новороденчето кое дојде на свет во најтешки можни услови го потсетија светот дека и под урнатините може да се роди живот.

Извор: Женски Магазин