Германските политички лидери реагираа со чудење и неразбирање на одбивањето на украинскиот претседател Володимир Зеленски да го прими германскиот претседател Франк-Валтер Штајнмаер.

„Германскиот претседател јасно и дефинитивно застана на страната на Украина. Германија беше и се уште е еден од најодлучните поддржувачи на Украина и овој факт е тесно поврзан со долгорочните активности на германскиот претседател“, изјави портпаролот на германската влада.

Тоа е повеќе од несоодветно.

Портпаролката за надворешна политика на владејачката Социјалдемократска партија на Германија (СПД), Нилс Шмид, изрази незадоволство од одлуката на Киев. 

„Ова е повеќе од несоодветно: ние сме пријателски земји и посетата на германскиот претседател заедно со другите претседатели требаше да биде позитивен сигнал“, рече Шмид, додавајќи дека одлуката на Киев во Германија „е целосно погрешно разбрана“.

Штајнмаер требаше да го посети Киев заедно со претседателите на Полска, Естонија, Литванија и Летонија, но украинската влада ја отфрли намерата на Штајнмаер и наместо тоа конкретно го покани германскиот канцелар Олаф Шолц да разговара за натамошната германска воена помош за Украина.

„Сосема незамисливо“

„Целосно е несоодветно вака да се спротивстават германскиот канцелар и германскиот претседател на овој начин“, рече Шмид, додавајќи дека „не гледа причина“ Шолц „само така да отпатува“ во Киев. Против заминувањето на Шолц за Киев се изјасни и потпретседателот на Бундестагот и лидер на владејачката Либерално-демократска партија (ФДП), Волфганг Кубицки, откако Киев го прогласи Штајнмаер за непожелен гостин.

„За мене е целосно незамисливо канцеларот на влада во која е сместена ФДП да оди во земја која највисокиот политички претставник на нашата земја го прогласи за непожелна личност“, рече Кубицки.

Германскиот претседател се извини

Реакцијата на Киев беше остро критикувана и од најголемата опозициска парламентарна група на Унијата, ЦДУ/ЦСУ. Портпаролот за надворешна политика, Јирген Хард, рече дека тоа е „голем товар за односите меѓу Германија и Украина“. Тој побара од германскиот канцелар денеска да оствари телефонски разговор со украинскиот претседател Зеленски.

Украина во неколку наврати го обвини Штајнмаер дека е поранешен министер за надворешни работи и еден од лидерите на СПД одговорен за попустливата и блага политика на Берлин кон Москва. Пред неколку дена Штајнмаер призна дека „грешел во минатото“ во градењето на односите меѓу Германија и Русија и се извини за тоа.