Со цел да ги олабави монетарните услови Чешката народна банка  ќе интервенира за ослабување на националната валута, круната.

При девизната интервенција, која Централната банка ја прави првпат по 11 години, целта е да се задржи курс од 27 круни за едно евро,соопшти ЧНБ.

- Способни сме да интервенираме неограничено против круната, толку долго колку што е потребно да ја достигнеме потребната вредност на курсот на круната, а со тоа и да ја исполниме целта за двопроцентна инфлација, изјави гувернерот на ЧНБ, Мирослав Сингер.

Чешките бизнисмени ја поздравија ваквата одлука поради нејзиното позитивно влијание на чешкиот извоз и националната економија.

Сепак според аналитичарите тоа ќе влијае на зголемување на цената на горивото, увезените производи, патувањата во странство преку туристичките агенции, електронските производи и останатите производи за три до четири проценти.

Интервенцијата на ЧНБ ја критикуваше и поранешниот претседател, економистот Вацлав Клаус, оценувајќи ја како погрешен и ризичен чекор.

- Централната банка е жртва на модата и на сосема погрешната доктрина на таргетирање на инфлацијата, рече Клаус, кој додека беше на чело на државата ги именуваше сегашните членови на Управен одбор на ЧНБ.

Клаус, смета дека не е потребна девизна интервенција, туку систематска измена во економијата, разумна фискална политика и враќање кон нормалната парламентарна политика