Група истакнати британски научници, собрани во Советодавната научна група за итни случаи (SAGE), развија четири сценарија поврзани со корона вирусот што може да се очекуваат во блиска иднина и ги нарекоа - оптимистичко, умерено оптимистичко, умерено песимистичко и песимистичко.

Укинувањето на сите мерки против коронавирусот и значителниот пад на бројот на заразени, создаде оптимистички став кај луѓето ширум светот дека на оваа смртоносна пандемија конечно и се ближи крајот. Но, и покрај моменталната подобрена епидемиолошка состојба и смирувањето на жестокиот бран, светските експерти се со ист став дека корона вирусот сигурно нема да исчезне, а стравуваат дека може да стане уште поопасен.

Она што е сосема сигурно е дека вирусот ќе се развива и ќе се менува во наредниот период, а според странските научници во моментов има четири можни сценарија за тоа како може да изгледа пандемија во следните 12-18 месеци. Двајца се оптимисти, а другите двајца укажуваат на тоа дека нè следи нов круг од она што тешко го поминавме. Заедничко за сите четири сценарија е дека корона вирусот ќе продолжи да циркулира меѓу населението и дека сигурно ќе има нови варијанти и соеви. Најголемите разлики, сепак, се поврзани со заразата и стапката на смртност од идните варијанти, како и колку често тие ќе се појават и каде.

Она што секако останува најважно е имунизацијата. Глобалната вакцинација ќе биде клучот за борба против короната, заедно со мониторинг, брзо откривање, нови лекови и тестирање. Брановите ќе бидат потешки и поопасни доколку не се откријат навреме, односно ако опфатот на вакцинација е недоволен – тврдат британските научници.

Оптимистичко сценарио

Бидејќи ковидот нема само да исчезне, најдобрата опција е да стане сезонски, да се појавува во текот на есен/зима, секоја година, но со помалку симптоми. Ќе се појават нови соеви, но нема да има големи промени и разлики во однос на претходните (нешто како разликата помеѓу омикрон и стелт омикрон), нема да предизвика потешки последици од, на пример, делта сој, а вакцините ќе бидат многу ефикасни против нив.

Во иднина може да се појават помали бранови или нови варијанти надвор од овој период во некои региони со мал број вакцинирани лица, но тие би биле со „ограничен ефект“.

Умерено оптимистичко

Малку помалку добро сценарио предвидува бранови во текот на есента и зимата слични на она што го имаме сега со вирусот омикрон. Значи, се предвидува дека короната ќе стане сезонска, во студените денови, но дека може да има подобри и полоши години. Во текот на т.н уште полошо, вирусот би можел да дејствува како што правеше за време на делта сој. Сепак, тешките и смртните случаи ќе бидат ограничени на најранливите, најстарите жители и оние со слаб имунитет.

Вакцините би се „апдејтирале“ секоја година и би се давале пред се на ранливите групи на население, додека некои земји би можеле во т.н. „лоши години“ да се воведе задолжително носење маска.

Умерено песимистичко

Според ова сценарио, во следните 12 до 18 месеци би нè дочекала нова варијанта на короната, ново сој, што би довело до поголем бран, потенцијално дури и надвор од есен/зимскиот период. Сепак, тешките и смртните случаи би биле „ограничени“ на најстарите и најранливите популации.

Ова сценарио предвидува појава на нови соеви во наредните години, понекогаш повеќе од еден во 12 месеци, а во „лошите години“ тие би можеле да бидат опасни како делтата. Леснотијата на пренос и избегнувањето на имунитетот на вакцината би биле слични на оние на омикрон.

Вакцините би се „освежувале“ секоја година, а добрата вест е што нема да има повторени бранови на инфекција, особено не кај училишните деца. Дури и според ова сценарио, некои земји би можеле да воведат задолжително носење маски.

Песимистичко

Според најлошото сценарио, големи бранови со потешки случаи ќе продолжат да се повторуваат во следните 12 до 18 месеци, а најзагрозени ќе бидат оние кои не биле вакцинирани или не ја прележале болеста досега.

Ќе се појават нови соеви, од кои некои многу успешно би ја намалиле ефикасноста на вакцината. Ова автоматски би довело до зголемување на смртноста, а особено долг ковид би бил во пораст.