За прв пат по три месеци, невработеноста во Германија, на изненадување на аналитичарите, во месец август се зголеми, покажуваат статистичките податоци. Ова, е показател за забавувањето на водечката европска економија. Иако аналитичарите очекуваа дека бројот на невработени лица ќе се намали за 5.000, сепак, нивниот број во месец август се зголеми за 7.000 и сега вкупната бројка на Германци кои бараат работа изнесува 2.95 милиони. Нивото на невработеност се задржа на 6.8 %, што е блиско до најниската вредност овие две години. Резултатите не се особено позитивни и доаѓаат непосредно пред изборите во Германија, кои ќе се одржат на 22 септември, на кои актуелната канцеларка, Ангела Меркел, ќе се бори за трет мандат.