Борис Џонсон се обидува да го протурка својот предлог за нов систем на политички, економска и воена унија која е алтернатива на ЕУ. Тоа треба да ги зближи земјите кои со скептичност гледаат на Брисел, како и на односот на Германија кон руската воена интервенција во Украина, објави „Кориере дела сера“.

Изданието тврди дека според познавачи, британскиот премиер ја плете својата мрежа повеќе од еден месец. Тој му ја претставил својата идеја на Владимир Зеленски кога тој отиде кај украинскиот претседател во Киев на 9 април. 

Моделот за европска заедница замислена од премиерот би ја вклучила Британија како лидер и покрај неа - Украина, Полска, Естонија, Литванија, Летонија и во понатамошната фаза евентуално Турција.

По посетата на Џонсон на Киев, разговорите во оваа насока продолжија и додворувањето на Британија стана уште поупорно на украинските власти, тврди изданието. Британскиот премиер сака унија на земји кои го чуваат својот национален суверенитет, економски либерални и решени на максимална нетолеранција на воената закана од Москва. 

Зеленски со нетрпение го очекува самитот на 23-ти јуни, кога земјите од ЕУ ќе објават дали да и дадат кандидатски статус на Украина. Според друга хипотеза, лидерите на ЕУ можат само да се ограничат на општа декларација дека Киев има „европска перспектива“ (т.н. Солунска формула).