Откако во 2018 година ја напушти функцијата министер за комуникации, 49-годишниот Авганистанец Сајед Садат, се пресели во Германија, каде што работи како доставувач на храна во градот Лајпциг. Работи за компанијата „Лиферандо“, носи портокалова униформа и вози велосипед со кој најбрзо и најлесно стигнува да ги достави нарачаните оброци.

Приказната за него ја објави Ројтерс, а во изјавата Сајед вели дека нема никаква причина да се срами.

-Се надевам дека и другите политичари ќе го следат истиот пат, ќе работат, наместо да се кријат. Јазикот е најважниот дел, го учам секој ден пред да ми почне смената. Колку повеќе излегувате, толку повеќе запознавате луѓе и повеќе учите, објаснува Садат.

Верува дека многу брзо ќе го совлада германскиот јазик и ќе има можност да работи во некоја телекомуникациска компанија.