Расте бројот на баратели на азил во Европската унија во вториот квартал од годината. Според анализата на Евростат, најодговорни за ова се граѓаните од Русија и Косово. Над 100 илјади барања во 27-те земји членки се поднесени во вториот квартал, што претставува зголемување од 50 проценти на годишно ниво, објави Евростат. Притоа најголем број апликации за азил има во Германија (26.400), а потоа следуваат Франција (16.424), Унгарија и Велика Британија (околу 9.000) и Италија (околу 6.000 барања). Најголем број барања за азил во ЕУ во второто тримесечје на годинава поднеле државјани на Русија (16.845), Сирија (8.310), Косово (8.140), Авганистан и Пакистан (по околу 6.000) и Сомалија (4.285). Како што вчера јави ДПА, бројот на баратели на азил во Германија е зголемен за 71 процент во септември во однос на истиот месец минатата година. Вкупниот број барателите на азил во најголемата економија во Европа изнесува 74.000 лица за периодот јануари-септември, што е раст од 85 отсто во однос на истиот период минатата година.