Министерот за надворешни работи на Австрија Себастијан Курц најави сериозни мерки за штедење на дипломатијата, откако неговото Министерство доби сериозни критики од ревизорите. Мерките кои ги најавува не им се допаѓаат на сите австриски дипломати, но треба да донесат заштеда од 4,4 милиони евра. Курц има намера драстично да ги намали трошоците за патувања, со што ќе заштеди 700.000 евра годишно. Освен ова скапите резиденции на австриските амбасадори во иднина ќе мора да се ограничат на 400 метри квадратни, а на тој начин Курц очекува да заштеди дури 2,3 милиони евра годишно. Дел од амбасадорите на Австрија во светот живеат во вистински палати. Така, австрискиот амбасадор во Прага има резиденција во најдобриот дел од градот со површина од 1.518 метри квадратни. Кога станува збор за администрацијата, шефот на австриската дипломатија сака да избегне секакво дуплирање на работите. Во оние земји каде што постојат повеќе претставништва на оваа земја, тие ќе треба да се спојат во едно, а дел од земјите во светот да се покриваат во соработка со други земји-членки на ЕУ. Ова на австриската дипломатија би и донело дополнителни заштеди од 1,4 милиони евра годишно.