Се плашев дека ќе ме уловат, ќе ме развлечат и исмејуваат на телевизија, а потоа пред милиони луѓе ќе ме силуваат и ќе ме фрлат како да сум парче месо, раскажала 36-годишната Ариана Сајед, авганистанска поп-ѕвезда. 

Taa успејала да избега од државата откако Талибанците ја преземаа власта. Вели дека не се плашела од смртта.  Ариана е позната пејачка и водителка на авганистанското музичко шоу „The Voice", а својата популарност ја користела за да ги инспирира другите жени да ги следат своите сништа и страста кон музиката. Ова е причината поради која добивала многубројни закани по животот. 

„Тајната служба ме предупреди дека во Кабул кружи авто-бомба пратена да ме убие мене, а потоа платиле жена да ме убие во текот на снимање на емисија на национална телевизија. Стоеше на само 10 метри од мене, а кога ја испрашуваа во затвор, кажа дека се би повторила ако е на слобода. Најтажно е што жените сакаат да им направат проблем на жените", рекла Ариана. 

Таа е една од ретките жени која успеала да влезе во авион со својот свршеник. 

„Беше хаотично. Талибанците стоеја на неколку метри од нас, ги држеа рацете зад грб и ги гледаа луѓето. Еден од нив дојде пред мене и во тој момент, иако бев целосно покриена, имав чувство дека тоа е мојот крај, дека ме препознаа", вели пејачката.

Следниот ден таа заедно со свршеникот, менаџерот Хасиб Сајед пристигнала на аеродромот во посебен автомобил во кој имало деца и жени.