Аргентина, Египет, Иран, Обединетите Арапски Емирати и Саудиска Арабија ќе станат нови членки на БРИКС, јави дописникот на бразилскиот информативен портал UOL, повикувајќи се на нацртот на завршната изјава од самитот на таа група, додека руските медиуми додаваат дека и Етиопија е меѓу идните членки.

Според известувачот, меѓу главните критериуми за избор бил географскиот фактор.

Овој избор беше направен за да се одржи регионалната рамнотежа во рамките на групата. Во согласност со овој принцип, сега се размислува за членство на друга африканска земја - пренесува ТАШ.

Исто така, владата на Бразил би сакала да ја види Индонезија како членка на БРИКС, но земјата сè уште не е подготвена да се приклучи на оваа група, се вели во извештајот.

За време на воведниот говор на третата сесија на 15-тиот самит на БРИКС, јужноафриканскиот претседател Сирил Рамафоса изјави дека интеграцијата во блокот ќе биде ефективна од 1 јануари 2024 година.

Тој посочи дека е постигнат консензус за првата фаза од процесот на проширување, а потоа ќе следат и другите фази.

Покрај тоа, Рамафоса изјави дека сите сегашни членки се согласиле да ја поддржат конечната декларација за настаните - Декларацијата од Јоханесбург II.

Групата формално им наложи на министрите за финансии и гувернерите на централните банки да го разгледаат прашањето за локалните валути, платежни инструменти и платформи и да ги известат лидерите на БРИКС до следното лето.

Рускиот претседател Владимир Путин рече дека прашањето за постигнување договор за обединета валута БРИКС е „предизвиклива задача“, но инсистираше на тоа дека блокот ќе работи на постигнување резолуција за ова прашање.

Во својот говор на самитот на БРИКС еден ден претходно, рускиот претседател изјави дека Москва е за проширување на употребата на локалните валути наместо доларот.

„Ова проширување на членството е историско и ја покажува одлучноста на блокот за единство и соработка“, рече кинескиот претседател Си Џинпинг за време на последната сесија на самитот, истакнувајќи дека одлуката е донесена „едногласно“.

Фото: EPA-EFE/GIANLUIGI GUERCIA / POOL