Министерот за надворешни работи на Иран, Абас Арагчи денеска ги повика земјите од Блискиот Исток да ја преземат својата „историска одговорност“ во борбата против Израел, по денешните напади на САД и Израел.

Во телефонски разговори со министрите за надворешни работи на Саудиска Арабија, Обединетите Арапски Емирати, Катар, Кувајт, Бахреин и Ирак, Арагчи предупреди дека „наметнатата војна“ од САД и Израел претставува закана не само за Иран, туку за целиот регион. Тој нагласи дека одговорност на сите муслимански народи и држави е да се спротивстават на „злото кое потекнува од Израел“, пренесува ИРНА.

„Иран ќе ги користи сите свои одбранбени капацитети за да го заштити својот суверенитет и територијален интегритет“, порача Арагчи.

Додаде дека „каква било помош за САД и Израел во извршувањето на агресијата против Иран мора да биде спречена“.

„Војната на Нетанјаху и Трамп против Иран е целосно неиспровоцирана, нелегална и нелегитимна. Трамп го претвори „Америка прва“ во „Израел прв“ – што секогаш значи „Америка последна“. Нашите моќни вооружени сили се подготвени за овој ден и ќе им ја одржат лекцијата што ја заслужуваат на агресорите“, напиша Арагчи на Икс.

Војската на САД и израелските воздушни напади погодија делови од централен Техеран и други градови ширум Иран.

Иранските власти соопштија дека силите на Револуционерната гарда ги нападнале американските воени бази во Бахреин, Обединетите Арапски Емирати и во други земји во регионот, како и цели во Израел.

Иран тврди дека загинале 24 ученички во нападите.

Американскиот претседател Доналд Трамп рече дека заканувачките пораки од Техеран ги загрозуваат САД. Истото важи и за нивните сојузници. 

foto printskrin youtube