Вулкан во Исланд еруптираше вчера по четврти пат од декември, соопшти Исландската метеоролошка служба, исфрлајќи светло портокалова лава во воздухот.

Властите со недели предупредуваат дека е неизбежна ерупција на полуостровот Рејкјанес јужно од главниот град на Исланд.

Вулканот последен пат еруптираше на почетокот на февруари, прекинувајќи го греењето на повеќе од 20.000 луѓе бидејќи тековите на лавата уништија патишта и цевководи, а во јануари лавата проголта неколку куќи во рибарскиот град.

Сместен помеѓу евроазиските и северноамериканските тектонски плочи, меѓу најголемите на планетата, Исланд е сеизмичко и вулканско жариште бидејќи двете плочи се движат во спротивни насоки.

Исланд, кој е отприлика колку американската сојузна држава Кентаки, има повеќе од 30 активни вулкани, што го прави северноевропскиот остров главна дестинација за вулкански туризам - сегмент кој привлекува илјадници трагачи на возбуда.

Во 2010 година, облаците од пепел од ерупцијата на вулканот Ејафјалајокул во јужен Исланд се проширија на големи делови од Европа, приземјувајќи околу 100.000 летови и принудувајќи стотици Исланѓани да се евакуираат.