Шпанскиот премиер Педро Санчез и неговата влада се обидуваат да ја смират ситуацијата по новиот вербален напад од страна на американскиот претседател Доналд Трамп, кој повторно остро ја критикуваше Шпанија за нејзините трошоци за одбрана за време на самитот на НАТО во Анкара и се закани со прекин на трговските односи, објави шпанскиот портал ABC.

Шпанскиот премиер пристигна на самитот подготвен да ја брани позицијата на својата земја и да докаже дека Шпанија е „сигурен сојузник“ на НАТО. Во првите часови од состанокот, се чинеше дека ќе избегне директни критики бидејќи Трамп ги повика другите членки на Алијансата, како што се Франција, Обединетото Кралство и Италија, но ова примирје беше краткотрајно.

Американскиот претседател набрзо жестоко го нападна Мадрид, обвинувајќи го дека „не учествува и не плаќа“ и велејќи дека повеќе не сака да соработува со Шпанија.

„Шпанија е ужасен сојузник на НАТО. Тие не учествуваат. Тие не плаќаат. Не сакам ништо да имам со Шпанија. Престанете со секаква трговија со Шпанија, ве молам, вклучително и посети“, рече Трамп.

Во друга изјава, тој дополнително го зголеми притисокот.

„Шпанија е непријателска. Ќе видиме колку се непријателски настроени кога ќе нè повикаат и ќе ни кажат: „Ве молам, господине, сакаме да тргуваме со вас“. Тие заработуваат многу пари од нас, но тоа ќе заврши. Не сакам да тргувам со нив“, рече тој.

Шпанската влада одговори речиси веднаш и повика на смиреност. Мадрид нагласи дека ова не е прв пат Трамп да упати слични закани, потсетувајќи дека тие не се материјализирале во минатото.

„И претходно сме биле во ваква ситуација“, соопшти владата, додавајќи дека нема причина за паника.

Кабинетот на Санчез соопшти дека Шпанија нема намера да ги менува своите одлични социјални и економски односи со САД.

Тие исто така нагласија дека САД не можат еднострано да ги прекинат трговските односи со Шпанија, бидејќи трговската политика е одговорност на Европската Унија, а не на поединечните земји-членки. Тие исто така истакнуваат дека економските односи меѓу двете земји се корисни за двете страни.

„Билатералните односи меѓу САД и Шпанија се корисни за двете земји, и во областа на трговијата и во областа на одбраната“, велат владини извори, додавајќи дека „економските врски ги создаваат приватни компании, а не влади“.

Портпаролот истакна дека САД имаат трговски суфицит со Шпанија, што значи дека технички имаат поголема корист од билатералните трговски односи. 

Нападите на Трамп во последните месеци се поврзани првенствено со одбивањето на шпанската влада да ги зголеми трошоците за одбрана на пет проценти од БДП, цел што ја поддржуваат и другите членки на НАТО. 

Токму поради ова прашање, американскиот претседател јавно го критикуваше Педро Санчез неколку пати, а најновите изјави покажуваат дека спорот меѓу Вашингтон и Мадрид сè уште трае.

Рекција пристигна и од Европската комисија, кои посочија оти очекуваат Соединетите Американски Држави (САД) да ги почитуваат своите трговски обврски и дека ќе ги заштитат интересите на сите земји-членки на ЕУ, по заканите на американскиот претседател Доналд Трамп кон Шпанија.

Заменик-главниот портпарол на Европската комисија, Олоф Гил, на редовната прес-конференција изјави дека ставот на Брисел за трговските односи со САД е јасен и дека нема да се промени.

„Трговијата меѓу Европската Унија и САД е длабоко интегрирана и заемно корисна. Затоа е во заеднички интерес да се зачува овој однос, особено во време на глобални нарушувања“, рече Гил.

Тој потсети дека Европската Унија и САД потпишаа заедничка изјава минатата година и додаде дека Брисел очекува Вашингтон да ги исполни своите обврски според тој документ, како што направи Европската Унија, рече тој.

„Комисијата секогаш ќе обезбеди целосно да се заштитат интересите на Европската Унија и сите нејзини земји-членки. Ќе продолжиме да се залагаме за стабилна, предвидлива и заемно корисна трансатлантска трговија“, рече Гил.

Фото: Принтскрин/Икс