Американската администрација ја запре испораката на одредени типови оружје за Украина, откако Пентагон заклучил дека залихите на САД за критични системи се „опасно намалени“. Тоа предизвика загриженост во Киев и меѓу западните сојузници во услови на засилена руска офанзива.

Одлуката, објавена на 1 јули, се однесува на системи кои не можат лесно да се произведат во краток рок и кои, според интерната процена на Пентагон, мора да бидат резервирани за потребите на самата американска војска.

Одредени видови муниција ги вети администрацијата на екс американскиот претседател Џо Бајден за Украина. Паузата во испораките ја одразува новата поставеност на приоритетите под раководство на претседателот Доналд Трамп и следува откако службениците од Министерството за одбрана ја анализираа моменталната состојба со американските залихи и изразија загриженост.

„Оваа одлука е донесена за да се стават интересите на Америка на прво место, по ревизија на воената поддршка и помош што САД ја даваат на други земји низ светот. Силата на американските вооружени сили е неспорна – прашајте го само Иран“, изјави портпаролката на Белата куќа, Ана Кели. 

Но, Киев соопшти дека ова само ќе ја охрабри Русија да продолжи да напаѓа. Русија е задоволна и вели дека колку помалку оружје добива Киев, толку поблиску е крајот. 

Руската инвазија на Украина почна пред три и пол години.