Сè поголем број Германци на возраст меѓу 14 и 29 години велат дека активно планираат да ја напуштат својата татковина.

 Во неодамнешна студија насловена како „Младите во Германија“, околу 21 отсто од анкетираните млади Германци рекле дека активно планираат да ја напуштат Германија за да најдат подобар живот. Дури 41 проценти рекле дека би можеле да замислат да се преселат во странство на долг рок, пишува Дојче Веле.

Испитаниците изјавиле дека се загрижени за економската безбедност во Германија, која во последните две години бележи стагнација на економијата. Растечките трошоци за домување, слабите кариерни перспективи поради вештачката интелигенција и зголемениот финансиски товар им го отежнуваат на младите луѓе да станат независни, рекле учесниците.

- Резултатите од студијата на драматичен начин покажуваат како притисоците од последните години влијаат врз младите луѓе - во форма на стрес, исцрпеност и растечко чувство на недостаток на перспектива - изјави директорот на студијата, Симон Шнецер.

Овие податоци укажуваат на сè поизразено незадоволство кај помладите генерации, кои сè повеќе ги доведуваат во прашање перспективите за живот во една од водечките европски економии. Особено е значајно што речиси половина од испитаниците размислуваат за трајно заминување, што оди подалеку од вообичаените миграциски трендови.

Клучен фактор се издвојува како чувство на економска несигурност - од зголемувањето на трошоците за живот до неизвесноста на пазарот на трудот. Ова се причините, според истражувањето, што ги охрабруваат младите луѓе да ја бараат својата иднина надвор од Германија.

Германија останува трета најголема економија во светот според номиналниот БДП, веднаш зад САД и Кина. 

Според истражувањето на Дестатис од 2024 година, Швајцарија е водечката дестинација, по што следи Австрија. Австриската престолнина Виена постојано се рангира меѓу најдобрите градови за живеење во светот, со своите сигурни јавни услуги и висок квалитет на живот. Во истражувањето за квалитетот на животот на Мерсер за 2024 година, градот беше рангиран на второ место во светот, зад Цирих. Други земји каде тежнеат да се иселат младите од Германија се градови во САД, Шпанија и Франција.

Аналитичарите предупредуваат дека овој тренд би можел да има долгорочни последици, првенствено преку одлив на образован и работоспособен кадар, што дополнително би ја оптоварило веќе сложената демографска и економска рамка на земјата.