САД ќе се обидат да ја убедат Кина да не и доставува оружје на Русија на состанокот на високо ниво во Рим, кој Белата куќа го смета за важен не само за војната во Украина, туку и за иднината на глобалната рамнотежа на силите. Џејк Саливан, американскиот советник за национална безбедност, ќе се сретне со неговиот кинески колега Јанг Јиечи поради извештаите дека Русија побарала од Кина оружје.

Саливан ќе истакне дека Соединетите Држави го информирале Пекинг за намерите на Владимир Путин неколку месеци пред инвазијата, но дека кинеското раководство ги игнорирало тие предупредувања, погрешно верувајќи дека Путин блефирал за да добие потпора, велат извори запознаени со плановите за средба во Рим. Саливан исто така ќе тврди дека ако Кина и испорача оружје на Москва, тоа ќе биде понатамошна, историска грешка и пресвртница во глобалната политика.

Саливан и Јанг ќе ги следат и договорите постигнати од Џо Бајден и Кси Џинпинг на виртуелниот самит во ноември, за подобрување на кризните комуникации меѓу двете нуклеарни сили.

„Ние внимателно следиме за да видиме до кој степен Кина обезбедува каква било форма на поддршка, материјална или економска, за Русија. За тоа сме загрижени. Ние, исто така, му кажавме на Пекинг дека нема да стоиме на страна и да дозволиме ниту една земја да ја поврати русија од загубите од економските санкции“, изјави Саливан за Си-Ен-Ен.