Американските разузнавачи тврдат дека Русија стационирала околу 70.000 војници во близина на границата со Украина и дека планира офанзива веќе следната година, изјави претставник на администрацијата на Бајден.

Американски официјални лица и поранешни американски дипломати велат дека иако рускиот претседател јасно ги поставува темелите за можен напад, украинската војска е денес подобро вооружена и поподготвена од кога било досега.

Бајден во петокот рече дека работи на „сеопфатна иницијатива“ што треба да го отежне Путин да ја нападне Украина.

„Она на што работам сега е да формирам најсеопфатен и најзначаен збир на иницијативи за да му биде многу, многу тешко на господинот Путин да го постигне она од што луѓето се плашат“, рече Бајден.

Украинските власти соопштија дека Русија би можела да ја нападне Украина следниот месец. Украинскиот министер за одбрана Алексеј Резников изјави дека бројот на руски војници во близина на Украина и на Крим се проценува на 94.300 и предупреди дека во јануари е можна „голема ескалација“. 

Сепак откако американските медиуми објавија дека постои опасност од потенцијален напад  набргу од Москва ги демантираа овие информации.

„Вашингтон Пост“ порано денеска повикувајќи се на официјални лица и разузнавачки документ, извести дека американските разузнавачи веруваат дека Русија потенцијално планира офанзива врз Украина, можеби веќе следната година, во која ќе бидат вклучени до 175 000 војници. Русија пак набргу ја демантираше информацијата, иницирајќи дека токму САД подготвуваат влошување на односите со Украина.