Марко Рубио и Сергеј Лавров се сретнаа во Манила на маргините на самитот на АСЕАН и разговараа за прекинување на војната меѓу Русија и Украина.

Државниот секретар на САД, Марко Рубио, изјави во четврток дека САД остануваат подготвени да играат „конструктивна улога“ во помагањето за прекинување на војната во Украина, по разговорите со рускиот министер за надворешни работи Сергеј Лавров на маргините на самитот на АСЕАН во Манила.

Зборувајќи по состанокот, Рубио рече дека американскиот претседател Доналд Трамп јасно ставил до знаење дека САД се подготвени да помогнат во посредувањето за прекинување на „бесмислената војна“ доколку се појави можност.

Тој рече дека Вашингтон ја пренел таа порака до Москва, но одби да ја окарактеризира позицијата на Русија за време на разговорите.

„Имавме добар разговор, искрен разговор“, рече Рубио за неговата средба со својот руски колега. Додаде дека нема да даде детали за тоа што се дискутирало.

„Соединетите Американски Држави, претседателот, беа јасни дека сме подготвени да играме конструктивна улога во постигнувањето крај на бесмислената војна и сме подготвени да го сториме тоа“, рече Рубио.

Лавров: Русија е подготвена за политичко и дипломатско решение

Од друга страна, Лавров „ја потврди подготвеноста на Русија за политичко и дипломатско решавање на конфликтот“, се вели во соопштението на руското Министерство за надворешни работи.

Рускиот министер, според соопштението, му рекол на Рубио дека Москва останува посветена на предлозите изнесени од претседателите Доналд Трамп и Владимир Путин за време на нивната средба во Алјаска во август 2025 година.

„Многу крвава војна“

Рубио рече дека конфликтот предизвикал огромни последици, посочувајќи на цивилните жртви и руските напади врз Киев. Тој додаде дека и Русија и Украина имаат интерес да ја завршат војната, но дека главниот предизвик останува да се најде решение „што двете страни можат да го прифатат“.

- Мислам дека ова е многу крвава војна. Мислам дека двете страни треба да имаат интерес да ја завршат. Предизвикот е да се најде крај што двете страни можат да го прифатат, и ние се обидуваме, и ќе продолжиме да се обидуваме да видиме дали можеме да најдеме среден терен што би го овозможило тоа, - рече Рубио.