На 18 октомври 2012 година ќе биде организирана првата обука во рамките  на Тренинг центарот на Македонска берза со што ќе се означи и официјалниот почеток на работата на овој Тренинг центар, проект реализиран со поддршка од Европската банка за обнова и развој, а во соработка со консултанти од конзорциумот на Виенската берза „CAPMEX“. Основната мисија на Тренинг центарот на Македонска берза е овозможување на континуирана и висококвалитетна едукација на сите пазарни учесници, имајќи предвид дека тоа е еден од најважните предуслови за понатамошен развој на македонскиот пазар на хартии од вредност. Во рамките на наставната програма на Тренинг центарот иницијално ќе бидат опфатени 7 теми на обуки: Принципи на пазарите на капитал, Планирање на лични финансии, Инвестициско банкарство, Корпоративно финансирање, Објавување на информации и односи со инвеститори, Анализа на финансиски извештаи и Фјучерси и опции. Секоја од обуките содржи најмалку 4, а најмногу 8 модули, при што содржината на модулите е креирана на начин што нуди можност за нејзино прилагодување огласно профилот на посетители на обуките. Предавачи ќе бидат истакнати домашни експерти од областа на финансиите и пазарот на хартии од вредност кои преку теретски и практични примери ќе им помогнат на посетителите на обуките полесно да ја разберат предметната проблематика и полесно да ги донесат своите деловни и инвестициски одлуки.