Започна кампањата под името “Растеме здраво“ која е проект на Шеф Огненовски во соработка со Општина Карпош. Проектот се состои од едукативни работилници за подигнување на свеста кај родителите за значењето на здравата исхрана и доближување на можностите за приготвување здрава храна за своите дечиња. Во првата фаза ќе се опфатат сите градинки во Општина Карпош, а потоа проектот продолжува во основните училишта. Работилниците ќе ги предводи Шеф Влатко Огненовски, кој е познат гастроном и готвач.

Денес, во Форца кафе бар и ресторан, Шеф Огненовски и градоначалникот на општина Карпош г-дин. Стевчо Јакимовски официјално ја претставија кампањата Растеме Здраво пред медиумите. Присутните имаа можност да се запознаат со проектот и воедно да ја дегустираат здравата храна приготвена од Шеф Огненовски.

Сашо Лазаровски, Претседател на Совет на Општина Карпош на медиа пресот изјави: “На огромно задоволство на општина Карпош, овој проект “Растеме здраво“ започнува токму кај нас. Општината Карпош ги поддржува сите настани кои се однесуваат на најмладите категории и со овој проект ќе ги научиме како да го чуваат своето здравје и здраво да се хранат“.

Познатиот шеф Влатко Огненовски на медиа ручекот изјави: ,,Македонија изобилува со сезонски овошја и зеленчуци. Нашата земја има се што ќе посакате. Потребно е сите заедно да ја реставрираме традиционалната македонска кујна која содржи сезонски домашни состојки. На овие работилници ќе разговараме, ќе готвиме, ќе дегустираме вкусна и здрава храна.

Првата работилница е во градинката Мајски Цвет во Општина Тафталиџе и продолжува во останатите градинки во целата општина. Родителите кои ќе ги посетат овие работилници ќе добијат директни насоки за начинот на кој треба да ја приготват храната за своите деца, а ќе добијат прилика и да ја дегустираат истата. На крајот на секоја презентација, тие ќе добијат брошура со неделни рецепти, изготвена од шеф Огненовски.

Ајде да рстеме здраво!