Одлука за воспоставување комунален ред на подрачјето донесе советот на Струга со чии одредби се уредуваат односите и начинот на вршење на комуналните дејности меѓу давателите и корисниците на услугите, како и мерките за нејзиното спроведување.

Според секретарот Зоран Гулицоски оваа одлука е за да се воспостави комунален ред кој со години наназад е еден од напроблематичните сегменти во градот. Со неа ќе се уредуваат јавните површини, излозите, начинот на користење на рекламните паноа и уредувањето на другите површини. Опфатени се и надворешните делови на станбените објекти во Струга, кои доколку се оштетени, треба да бидат санирани.

- Одредени делови на станбените објекти како што се терасите, балконите, влезните врати, прозорците и друго треба да бидат уредни и чисти, а нивните оштетувања мора да бидат поправени. Ова, за жал, во Струга го имаме кај стотина објекти кои се до ден-денес руинирани и поради оштетувањата и дотраеноста го нагрдуваат општиот изглед на улицата и населбата. Тие треба да се уредат или да се срушат, објаснува Гулицоски.

- На прозорците и балконите може да се чуваат само цвеќа, украсни билки на начин што не ја загрозуваат безбедноста. Исто така граѓаните коишто имаат живи огради, треба да ги одржуваат и да ги кастрат за да не се загрозува безбедноста на сообраќајот, додава Гулицоски.

За успешно спроведување и почитување на законските одредби кои ја третираат комуналната дејност ќе се грижат униформираните комунални редари, кои имаат право да побараат лична идентификација на граѓаните, но и за изречат мандатни казни во висина од 50 евра за секое лице што ќе ги прекрши законските одредби пропишани со Одлуката за воспоставување комунален ред.

- Против прекршителите на одредбите на Законот за комунални дејности, за комунална чистота и Законот за управување со води може да се поведе и прекршочна постапка пред надлежните институции, предупредува Гулицоски. Доколку надлежните општински инспектори во својата работа бидат попречени, имаат право да побараат и помош од полициските органи.