Стопанска Банка а.д. Битола донесе одлука и оваа година, финансиски да го поддржи Здружението на граѓани за третман на лица со Аутизам, АДХД и Аспергеров синдром- Во мојот свет.

„Како и за повеќе други болести, така и за овие, во нашето општество постои недоволна спремност да се прифатат тие лица,  да се инволвираат во образовниот систем, да се изнајдат начини како да им се олесни секојдневниот живот... Целта на нашата банка е, во рамките на нејзините можности да ја поддржиме  работата на ова Здружение, кое ја олеснува животната битка на илјадници семејства на чии деца им е дијагностициран аутизам, АДХД и Аспергеров синдром“, велат од банката.

Во знак на бладогарност, за хуманоста на менаџментот и вработените во Банката, децата со аутизам и децата волонтери на Здружението, изработија цртежи кои ги подаруваат на Стопанска Банка а.д. Битола .

На нивно огромно задоволство, тие ќе бидат искористени за нивниот корпоративен календар, а потоа ќе бидат изложени во нивните простории.

Хуманоста ја покажува големината на луѓето кои помагаат, а кога тој гест е насочен кон децата со чисти срца, се уште повеќе се исполнуваат и срцата на оние кои помогнале.

Стопанска Банка а.д. Битола континуирано ја потврдува својата мисија, да биде општествено одговорна институција која им излегува во пресрет и им помага на оние на кои тоа им е најпотребно.