Во Домот на културата „Марко Цепенков“ денеска со изложба на маски изработени од вештите раце на учениците од прилепските училишта почнуваат свеченостите за годинашниов 13-ти по ред меѓународен карневал во Прилеп „Прочка 2013“.

Во галеријата од Домот вечерва првпат ќе биде отворена изложба на „Венецијански карневалски маски“ изработени од прилепчанката Жаклина Костоска.

Ќе бидат изложени 150-ина маски изработени во „Папиер маше“ техника. Костоска со оваа техника работи две години и ја усовршувала по посетата на Венеција.

Утре, во рамки на Карневалот во центарот на Прилеп ќе парадираат мажоретки, кловнови, жонглери и пантомимичари. В недела напладне е големото меѓународно карневалско дефиле. Се очекува да учествуваат околу 3.000 маскирани. Стручно жири ќе ги награди најдобрите групни и поединечни маски. Организаторите, локалната самоуправа и здружението „Прилепски мечкари“ очекуваат гости од земјава и од странство. Најавени се карневалски групи од Албанија, Бугарија, Србија, хрватска, Словенија и за прв пат од Воден Грција.