Урбанизацијата и можностите за привлекување странски капитал за изградба на преработувачки капацитети за ориз и за други земјоделски производи, биле главни теми на денешната средба на заменик-министерот за земјоделство, шумарство и водостопанство,Зоран Коњановски со земјоделците од општината Чешиново-Облешево. „Субвенциите лани достигнаа 4 милиони евра и нив ги користеа 3.500 семејства од регионот кои се занимаваат со земјоделство. Посебно водиме сметка за оризот. Површините во 2007 година беа 2.993 хектари, а во оваа 2013 година достигна 4770 хектари, со зголемување за 60 проценти и приноси од 6 до 7 илјади килограми од хектар“, истакна Коњановски. Тој исто така потсети на како што рече , успешната соработка со турската компанија „Тика“ во експерименталното производство на ориз на кочанските полиња. На земјоделците од овој реон пак им порача да се здужуваат и формираат поголеми задруги. Од месната заедница Чешиново денеска пак најавија дека за денот на општината планираат да сварат еден тон сутлијаш во 5- тонскиот казан во кој жителите на Сарчиево го сварија гинисовото гравче. Млекото и оризот за сутлијашот се донација од мештаните, а останата програма ќе ја финансира општината. Поради задоцнета покана до официјалните судии, годинава сутлијашот ќе се вари за рекорд, но тој нема да влезе во официјалната гинисова книга на рекорди.