Под мотото „Скопје се сеќава" ќе бидат организирани неколку месечни активности по повод одбележувањето на 50-годишнината од катастрофалниот земјотрес во Скопје, информираат градските власти. -На одбележувањето на половина век од катастрофалниот земјотрес во Скопје, нам ни останува да продолжиме да го градиме Скопје, со единствена цел-подобар живот за неговите граѓани, но и да не заборавиме дека во ова Скопје, пред се, се гради соживотот, мултикултурноста, меѓусебното разбирање и религиската хармонија", истакна градоначалникот на Град Скопје, Коце Трајановски. Во соработка со Министерството за надворешни работи, македонските амбасади во странство, здруженијата на Македонците во одредени земји и збратимените градови, ќе се изрази благодарност до сите оние хумани земји и граѓани што помогнаа по земјотресот, кога 80% од градот беше уништен или оштетен, урнатините затрупаа 1 000 жртви, а 100 000 луѓе останаа без дом. Со креативната платформа „Скопје ви се заблагодарува", Градот Скопје планира активности со кои ќе се заблагодари за хуманоста покажана во минатото. -По повод јубилејните 50 години од скопскиот земјотрес, под мотото 'Скопје се сеќава' низ разновидна програма ќе се обидеме скопјани да ги потсетиме на немилиот настан, на случувањата и чувствата од тоа време, а кои до ден-денес се дел од сите нас. Под една поширока платформа обединуваме голем број институции и организации кои имаат заедничка цел да обединат, да мотивираат и испратат заедничка порака", рече Вера Бошкова, директорка на Универзалната сала-Скопје. Активностите ќе почнат веќе идниот месец, додека поинтензивни активности се планираат во деновите пред 26 Јули, со еден централен мултимедијален настан на самиот ден.