Ќе се менува  Законот за води на барање на земјоделците и рибопроизводителите. Ова се прави поради олеснување на постапките за стекнување со водокорисничко право за земјоделците и за корисниците на вода за рибници, кои поради сложеноста на постапките предвидени со Законот за водите неможат да ги користат средствата од ИПАРД програмата. „Со предложените измени се предвидува можност сопствениците и корисниците на земјоделско земјиште да можат да користат вода за наводнување без прибавување на дозвола, во случај кога земјиштето не е опфатено со систем за наводнување и кога потребните количини вода не надминуваат еден литар во секунда, појасни Министерот за животна средина и просторно планирање Абдилаќим Адеми. Најзначајните измени се предвидуваат во делот кој се однесува на заштита од штетно дејство на водите, каде се врши допрецизирање и подобрување на постапката за добивање на дозвола за вадењето на песок, чакал и камен од коритата и бреговите на водотеците, езерата и акумулациите, заради подобрување на режимот на водите, со цел дефинирање на надлежностите и воспоставување на контрола над вршење на оваа дејност со цел да се отстранат можностите за злоупотреба. Со новите измени и дополнувања исто така се регулира финансирањето на управувањето и развојот на водите, се определува висината и начинот на плаќање на надоместокот за миење и сепарирање на песок, чакал и камен.