Во Охрид ќе се одржи голема регионална конференција под назив „Иднината на регионот“,  со цел испраќање на порака за пријателство и мир од Македонија, за економска соработка и грижа за младите генерации. Ќе се промовира Сојузот на Ротари клубовите од Македонија во рамките на Ротари Интернационал, но ќе се претстави и Република Македонија како колевка на луѓе со добра волја на Балканот. На конференцијата се поканети да учествуваат Ротаријанци од Албанија, Бугарија, Косово, Македонија, Северна Грција, Србија, Турција и Црна Гора, и се очекуваат повеќе од 250 пријави за учество. Официјален јазик на конференцијата ќе биде Англиски но за ротаријанците на кои им е тоа потребно, ќе биде обезбеден симултан превод за време на работниот дел на конференцијата. Оваа конверенција не е замислена да биде само можност за средби и развивање на добра волја меѓу ротаријанците од разни нации, религиски или етнички припадности, и за ширење на заедништвото и јакнење на меѓусебното пријателство. Учесниците на конференцијата, ќе имаат единствена прилика да чујат видувања за политички, економски и социјални аспекти на животот на луѓето од регионот, преку излагањата на истакнати меѓународни експерти, широко почитувани заради своите познавања и позитивниот придонес за регионот.  Поттикнати од зборовите на Претседателот на Ротари Интернационал Калјан Банерџи за 2011/2012 година и почитувајќи еден од основните принципи на филозофијата на Ротари, кој промовира унапредување на меѓународното разбирање, ширење на добра волја и мир, преку дружењето на Ротаријанците од цел свет, Сојузот на Ротари клубови во Македонија реши да ја организира оваа регионална Ротари конференција. .