Академија за менаџери денеска го одржува првото викенд предавање од програмата за стратешко менаџирање на мали и средни претпријатија- односно за тоа како се гради  и одржува конкурентната предност. Закажано за 10.45 часот, во хотелот „Квинс" во трговскиот центар Зебра, предававач ќе биде др Емануел Гомес, истакнат професор за стратегија и меѓународен бизнис при Универзитетот Шефилд. Свое предавање ќе има и Стелиос Кехајас, консултант и сениор професор на „CITY Колеџот“ при истиот универзитет. Целта на Академијата за менаџери е да го подигне нивото на компетентноста и квалификациите во менаџментот низ развој и дистрибуирање на алатки за менаџерско размислување, техники и практики, додека на неа ќе се работи на научно-истражувачка дејност од областа на менаџментот и економијата, како и кратки програми, модули, обуки за менаџерски кадар од областите корпоративно управување, менаџмент, управување со финансиски текови, управување со ризици, водење преговори, маркетинг и модули за едукација на државни службеници за менаџирање во јавната администрација. Универзитетот Шефилд е еден од најстарите британски универзитети, со светски углед за квалитет. Тој е водечки истражувачки универзитет, со седиште во Шефилд, во јужен Јоркшир, Англија. Во 2011 година е именуван за универзитет на годината во Велика Британија од страна на Times Higher Education Awards за академската 2011 - 2012 година. Според QS ранг листата од 2012 година, Универзитетот Шефилд е 11-ти во Велика Британија, 20-ти во Европа, 66-ти во светот и има пет добитници на Нобеловата награда. Академијата за менаџери е формирана под академска надлежност на Универзитетот Шефилд, CITY Колеџ - Меѓународниот факултет на Универзитетот Шефилд, во соработка со Сојузот на стопански комори на Македонија и Министерство за образование и наука на Македонија.