Оригинален примерок на книгата „Малиот принц" од францускиот писател Антоан де Сент-Егзипери, вклучувајќи и четири илустрации и посвета од авторот, беше продаден на аукција во Париз за близу 90 000 евра, пренесе Франс прес.

Примерокот е оригинал од американското издание на делото. Сент-Егзипери го напишал и го илустрирал „Малиот принц" во 1942 година, додека тој и неговата сопруга живеат во Лонг Ајленд, САД. Книгата  прв пат е објавена една година подоцна во Њујорк.

Овој примерок  е подарок од Антоан де Сент-Егзипери за неговиот пријател и иден генерал на француските воздухопловни сили, Лионел-Макс Шасен и е со посвета од авторот за најголемиот син Дуду Шасен.