Гран при за спотот „10 метри одвоени“, на фестивалот „Пиран идеја“ во Словенија, освои македонската маркетинг-агенција „Њу момент – њу идеас компани“. Овој спот беше изработен за Владата на Република Македонија, а со него се промовира мир и разбирање меѓу муслиманите и христијаните преку заедничка молитва. За наградите во Словенија се натпреваруваа четиринаесет агенции во 13 категории, а жирито што одлучуваше кој ќе ги добие наградите, го сочинуваат креативните директори на компанијата-организатор. Меѓу нив се Рајан Рид од Дубаи, Педро Фереира од Португалија и Вики Џито од Италија, претседател на жирито. Освен натпреварувачки дел, фестивалот вклучуваше и настапи на повеќе говорници и презентации. Специјалното признание „Драган Сакан“ го доби Џејми Манделбаум, прв креативец на „Јанг енд Рубикам“ за централна и за источна Европа со седиште во Чешка. Петр Хавличек, главен извршен директор на компанијата „Њу момент“ од Белград, за централна и за источна Европа и прв човек на канцеларијата во Прага, ја издвои кампањата на „Њу момент – њу идеас“ од Скопје, „10 метри одвоени“, со која „Јанг енд Рубикам“ го освои првиот титаниумски лав на фестивалот на креативноста во Кан. - Ова е совршен пример за нашиот менталитет на „глобален бутик“. Тоа може да се случи само на мал пазар како овој. Навистина е локална, но идејата е поголема – подвлече Хавличек. Фестивалот го организира американската компанија „Јанг енд Рубикам“, а го посетија делегати од 14 земји од централна и од источна Европа.