Задолжителната обврска за зимска опрема во возилата започнува да важи од 15 ноември (недела).

За возачите на автомобили, џипови и лесни камиони ова значи дека ќе мора да имаат зимски гуми на возилата и синџири за снег.

Возачите на автобуси и тешки камиони, пак, ќе мора да имаат и лопата ако на погонските тркала не може да се постават синџири за снег.

Што сè треба да имате за да не ве казнат:

За моторните возила со тежина која не надминува 3 500 кг во зимска опрема влегува:

- зимски гуми на сите тркала со минимална длабочина од 4 милиметри

- гуми со летен профил на сите тркала со најмалку 4 милиметри длабочина по слојот што гази, ако возилото во приборот има синџири за снег со адекватна големина за погонските тркала или други соодветни помагала.

Како зимска опрема за моторни возилата со погона на четири тркала (4 х 4) потребни се

– зимски пневматици на сите тркала, со минимална длабочината на шарите на слојот што гази по обем и широчина, од 6 mm.

Како зимска опрема на моторни возила со најголема дозволена маса која надминува 3.500 kg се подразбира:

-зимски гуми на погонските тркала со минимална длабочината на шарите на слојот што гази, по обем и широчина, од шест mm.

-пневматици со летен профил на сите тркала со длабочината на шарите на слојот што гази, по обем и широчина, со минимум од четири mm. Ако возилото во приборот има синџири за снег со адекватна големина за погонските тркала или други соодветни помагала.

- автобуси и товарни моторни возила кои поради технички причини не можат да постават синџири за снег на погонските тркала треба да имаат зимски пневматици на погонските тркала и прирачен алат – лопата.

Зимски пневматици се оние кои на својата бочна страна имаат ознака: „MS“, „M+S“, „M&S“ и знак на снегулка на стилизирана планина со три врва.

Во патниот сообраќај на возилата не се поставуваат пневматици со клинци.

Обврската за задолжителна зимска опрема трае до 15 март следната година.