Сите винарски визби да го почитуваат законскиот рок за исплата на грозјето од ланската реколта, кој истекува на крајот на овој месец, побара директорот на Државниот инспекторат за земјоделство Румен Стаменов, кој синоќа во Кавадарци се сретна со претставници и на лозарите и на винариите. „Исплатата на грозјето откупено лани треба да заврши до крајот на овој месец. Ги имаме предвид интересите и на лозарите и на винарите и се грижиме и за едните и за другите, бидејќи тие се составен дел на лозаро-винарството. Лозарите не можат без винарите и обратно“, изјави Стаменов. Тој потсети дека за неплаќачите се предвидени и законски санкции, а освен тоа тие ќе ја изгубат и довербата на лозарите кои во иднина ќе избегнуваат да ги снабдуваат.