Македонските компании - извознички на рускиот пазар се категорични - немаат никакви информации дека некоја од нив се обидела да го злоупотреби извозот во Русија и да реекспортира европски производи на рускиот пазар. „Доколку нашите институции ги потврдат информациите од руска страна, тогаш ќе го осудиме секој што работел спротивно на прописите“, вели претседателот на Агро бизнис комората и член на Управниот одбор на Македонско-руската стопанска комора Огнен Оровчанец. „Прецизна информација дека е вршен реекспорт се уште нема, засега се се сведува на сомнеж. Ние уште од самиот почеток апелираме на онба што Русија го постави како услов и сметаме дека домашните производители тоа го почитуваат“, додава Васко Ристовски од Стопанската комора на Македонија. Македонија досега имаше одреден бенефит од фактот што руското ембарго не важи за македонските производи. Во првите девет месеци од Македонија во Русија се извезени околу 10.000 тони овошје и зеленчук наспроти 8.700 тони во 2013-та.