Голема заинтересираност има за луксузните апартмани кои се наоѓаат на највисоките катови во висококатницата во Аеродром, чија цена е 3.000 евра за квадратен метар, информира порталот Плусинфо. - Продажбата оди одлично, дури и подобро од очекуваното, коментира претставникот на „Џеваир холдингот“ во земјава, Ејуп Учук. Иако во јавноста неодамна проструи информација дека токму за еден од овие апартмани бил заинтересиран и познатиот турски актер, кој го игра Полат во серијата „Долина на волците“, засега тој сè уште не е станар на овој луксузен комплекс облакодери. - Актерот нема купено стан и нема никаква гаранција дека ќе купи. Засега сè се сведува само на збор, на пројавен интерес од негова страна за евентуално купување на апартман во една од четирите висококатници - вели Учук. Цената на становите на пониските катови, за кои всушност има и најголем интерес, се движи до 1.100 до 1.350 евра. Колку точно станови се продадени, Учук не можеше да ни даде информација, но, сепак, истакна дека иако има заинтересирани клиенти и надвор од земјава, досега немаат продадено стан на некој странец.