Откупувачите на грозје од Албанија во моментов се најголемите трговци со тиквешкото грозје, соопшти Љупчо Аризанов, претседател на регионалниот Сојуз на лозари „Агротиквешија”. Според него, грозјето од најголемиот лозаро-винарски регион во Македонија, освен за Албанија во голем дел заминува и за Црна Гора, но и во останатите земји од соседството. Аризанов информира дека од стартот на бербата до сега се извезени над 7 милиони килограми десертно и винско грозје само преку царинскиот терминал Кавадарци. Но, вели тој, извозот е многу поголем, ако се има предвид фактот дека грозје се продава надвор од Македонија и директно преку граничните премини. - Веќе се чувствува навалица на странци кои доаѓаат да купат грозје од најголемиот лозаровинарски регион во Македонија. Нема доволно грозје, тоа е факт. Ми се чини дека килограм „смедеревка” годинава ќе достигне и цена од над 12 денари за килограм - тврди Аризанов.