Јавното претпријатие „Македонски шуми“, објави оглас за дури 1600 нови вработувања. Станува збор за проектот за вработување  на социјално загрозени  лица, а кој ќе добие работа ќе се знае за еден месец. Според најавите, една третина од работниците ќе останат во ова претпријатие, а останатите ќе се распределуваат во другите институции. Притоа се бараат илјада помошни работници, 500 референти и 100 соработници и советници.

Како што информираше портпаролот на Владата Александар Ѓорѓиев, за работа може да аплицираат оние кои подолго време се невработени односно повеќе од 10 години, лица од многудетни семејства, самохрани родители и еднородителски семејства, невработени лица од семејства каде нема ниту еден вработен. Тој посочи и дека на овој оглас се исклучива секоја можност за лобирање и протекционизам при вработувањето. Исто така, додаде Ѓорѓиев, досега имаат добиено податоци од институциите за потреба од ангажирање дактилографи, стенографи, чувари, обезбедувачи на објекти, курири, доставувачи на пратки и други отворени работни места каде што ќе треба да се сместат новите работници.

Огласот важи до 22 јуни.