Вчера Општина Аеродром по трет пат пулсираше во ритамот на хуманоста и спортскиот дух. Повеќе од две илјади граѓани истрчаа километри полни љубов и разбирање, а децата уште еднаш покажаа дека овој настан е во вистинска смисла на зборот-“Трка на херои во сите бои” и храбро истрчаа во име на хуманоста, љубовта и свет еднаков за сите.

Од третото издание на трката “Зегин Спектратон- Трка на херои во сите бои” која е во организација на компанијата Зегин и Фондацијата Д-р Верица Механџиска, вкупно ќе бидат донирани околу 50.000 евра од кои 18.000 евра беа собрани од котизациите на сите пријавени учесници, а Фондацијата Д-р Верица Механџиска дополнително ќе ги донира останатите средства со кои оваа година ќе бидат помогнати неколку здруженија и тоа:

Здружение Специјална Олимпијада – Македонија- Проект за инклузивни спортски активности за лица со нарушување од спектарот на аутизам и интелектуална попреченост.

Здружение за асистивна технологија „Отворете ги прозорците“- Проект за поддршка на родители на деца со аутизам во процесот на остварување на права, обезбедување соодветни услуги и примена на алатки за асистивна технологија, алтернативна и аугментативна комуникација

Здружение за промоција и развој на инклузивно општество „Инклузива“- Проект: Изградба и опремување на креативен центар за невродивергентни лица во Куманово

Организаторите со гордост изјавија дека Зегин Спектратон станува сè попопуларен настан и изразуваат благодарност до сите граѓани и компании кои сè повеќе ја препознаваат и поддржуваат оваа иницијатива чија цел е да се помогне на лицата со аутистичен спектар.  Ваквите настани се показател дека општествената одговорност треба да биде важен сегмент на сите компании и поединци кои можат во голема мера да помогнат за подобрување на квалитетот на животот на оние на кои им е најпотребно.