Учество во реализација на стотина проекти во делот на обновливи извори на енергија, производство на електрична енергија, но и изградба на првите мали хидроцентрали во Македонија, од кои се завршени 14, а се градат уште 5 хидроелектрани, се само дел од успесите на групацијата Фероинвест што одбележа 10 години од своето постоење. „Фероинвест е доказ дека се е можно ако се има добар план и идеја за бизнис. Патот е лесен ако сакате да успеете, а ако не сакате секако ќе ви биде тежок. Зад историјата на Фероинвест стои посветеност и иновативност, затоа што сме први во многу сегменти во кои делуваме, а кога сте први вие ги поставувате стандардите“, изјави генералниот менаџер на компанијата, Кочо Анѓушев. Фероинвест е меѓу првите што отвори македонска компанија за продажба на електрична енергија користејќи ги бенефитите од обновливите извори на енергија и формирајќи балансна група на потрошувачи што ќе и овозможи по либерализација на пазарот на струја да понуди најприфатлива цена за македонските компании. Фероинвест како групација ја сочинуваат компаниите Брако, Аквават, Мали хидро електрани, Езеро МХЕ, Другово-Студеница, Хидро Осогово, Еnergy maintenance solutions и Energy delivery solution. Групацијата е формирана во 2003 година и има околу 600 вработени. Компаниите делуваат во областа на металопреработувачката индустрија, на обновливи извори на енергија и на трговија со електрична енергија.