Викендов во Крива Паланка заврши економскиот кампус на 37 млади од Македонија, Романија, Унгарија, Бугарија, Албанија и Црна Гора, во рамки на проектот „Млади маркетинг лидери“, кој е во функција на промоција на економските и туристичките потенцијали на Република Македонија.

- Основна цел на проектот е продлабочување на маркетинг знаењата преку подобро взаемно претставување и информирање во функција на директно поврзување на економиите на горенаведените држави, како и развојот на туризмот“, истакна Снежана Јовановска, претседател на Асоцијацијата за истражување, едукација и развој на „маркетинг портата“.

Таа додаде дека ова е одлична можност Крива Паланка како град на културата за 2013 година да направи и сопствено промовирање пред учесниците на работилницата како алатка за промовирање на природните богатства, културното наследство, фолклорот и традицијата со која располага градот и пошироката околина.

Без добра промоција, неопходни информации, добри идеи, производ или услуга сето ќе остане на лист хартија, а наша цел е да се оствари плодна соработка не само со овие држави, туку и со останатите заинтересирани земји од целиот свет, истакна проф. д-р Снежана Тодоровска.

Организатор на проектот „Млади маркетинг лидери“ е Асоцијацијата за истражување, едукација и развој „Маркетинг порта“ од Скопје и општината Крива Паланка со поддршка од Европската комисија.