Заврши постапката за вселување на 91 семејство од социјално ранливите категории кои во 2012 година добија станови во зградата во штипски Сењак.

Според Томе Биновски раководител на АД-ССДП правната постапка е завршена, а Управниот суд ги одбил седумте жалби на кандидатите кои не добија станови во оваа зграда.

- Поминати се сите правни процедури. Имаше можност за жалба до Управниот суд и до првостепената комисија. Имаше и второстепена постапка и на крајот Анткорупциската комисија даде зелено светло дека конечно можат да се вселат во становите. Значи поминаа сите фази и никој не може да ја оспори валидноста на решенијата, истакна Биновски.

 Становите за социјално ранливите категории во Штип електронски беа распределени кон крајот на ноември 2012-та година, а договорите со семејствата кои се добитници на становите ќе почнат да се потпишуваат од наредната недела.