Заедничкиот регионален пазар (ЗРП) е златно правило, а не природен закон. Тоа не се однесува на секоја визија што владите или земјите во регионот ги имаат, ниту на сите добри или лоши билатерални односи – изјави генералната секретарка на Регионалниот совет за соработка (РСС) Мајлинда Брегу, на денешниот состанок на министрите за надворешни работи во рамките на Берлинскиот процес.

Брегу потсети дека лидерите на земјите од Западен Балкан го подржале ЗРП како план на ширење и изградба на регионот и дека иако постојат јасни резултати, тимовите на РСС се уште имаат потешкотии за остварување на целите, особено оние поврзани со слободата на движење.

„Регионалната соработка не треба да биде важна само затоа што Берлин, Брисел, Вашингтон, Париз, Рим или Виена ја бараат, туку затоа што сите партнери го бараат тоа. Таа е најважна цел што ја одбрал регионот за да работи на процес кој носи корист на граѓаните, било во трговијата, решавање на тесните грла во превозот, ослободување на потенцијали за четири слободи, за зелена и дигитална транзиција. Што е уште поважно, иднината не е договарање на самитите, туку станува збор за луѓето: депопулација, образование, бизнис, технологија, работни места, дигитална сфера, поврзување, итн“, рече Брегу, потсетувајќи дека РСС активно работи на проекти, каков што е ослободување од роаминг на Западен Балкан, што ќе стапи  во сила за помалку од еден месец, на 1-ви јули.

Таа додаде дека „иако постојат некои јасни резултати и веќе се вложени значителни напори за воведување на ЗРП, пред нас се уште километри пат, посебно на важните договори за слобода на движење, кои што ќе ја овозможат внатрешната регионална мобилност и ќе ги поедностават административните процедури за слободата на движење врз основа на биометриските идентификациони документи, регионално признавање на високошколските квалификации на докторите на медицина, стоматолозите и архитектите, како и проширување на Зелените коридори 2.0“.

Домаќин на министерскиот состанок беше Хајко Мас, германски министер за надворешни работи, а на состанокот учествуваа министрите за надворешни работи на 6 земји од Западен Балкан и претставници на Европската Комисија, меѓу кои и  Оливер Вархеи, комесарот за проширување и добрососедство.