Осумдесетина компании членки на Сојузот на стопански комори вчера беа дел од бизнис средбата „Од бизнисите за бизнисите“, организирана од ПроКредит Банка и Услужната комора во рамките на ССК со цел да поттикне создавање нови, но и продлабочување на досегашните бизнис релации. На бизнис средбата стопанствениците лично беа советувани околу можностите за бизнис инвестиции и кредитирање од страна на стручните банкарски советници од ПроКредит. Претседателката на Услужната Комора при ССК, Данела Арсовска истакна дека и двете институции се залагаат за подобрување на бизнис климата, како и развој во работењето на претпријатијата. „Сите сме сведоци на економската криза која произлезе од европската должничка криза, која пак дојде кратко по завршувањето на светската економска криза и која на сите ни е сериозен проблем, но и покрај тоа секој бизнис успева да се одржи и да функционира.   За поддршка и развој на компаниите од големо значење е зголемување на кредитирањето, кое во голема мера ќе придонесе за подобрување на ликвидноста на компаниите“, истакна Арсовска. Емилија Спировска- Член на Управен Одбор на ПроКредит Банка рече дека ПроКредит Банка е партнер на Сојузот на стопански комори работејќи со заедничка цел – поддршка во развојот на бизнисите и нивно понатамошно унапредување. “Измината деценија докажавме дека работевме посветено со активна  банкарска поддршка кон бизнисите, не само во добри туку и во предизвикувачки времиња. Нашите идни планови се зајакната финансиска поддршка кон компаниите од македонскиот услужен сектор и производствениот сегмент по намалени каматни стапки и со повластени услови”- изјави Спировска.