Агенцијата за финансиска поддршка во земјоделството и руралниот развој денеска објави повик за користење финансиски средства од Програмата за финансиска поддршка на руралниот развој за 2012 година за мерките инвестиции за модернизација на земјоделски стопанства и за преработка и маркетинг на земјоделски производи.

За овие неповратни средства може да аплицираат земјоделски стопанства, трговски друштва, задруги и правни лица кои ќе ги користат за инвестиции за набавка на нови основни средства, оперативни трошоци поврзани со набавените средства и останати трошоци предвидени со Програмата. Финансиската поддршка се исплаќа по принцип на кофинансирање на завршени и исплатени инвестиции од  корисникот, а е во висина од 50 проценти од вредноста на одобрените прифатливи трошоци за инвестиции, доколку поинаку не е определено. Апликациите се поднесуваат до Агенцијата за финансиска поддршка во земјоделството и руралниот развој, до 28-ми декември.